10 gurit kanthi tema Kabudayan

1.    Budaya kudu rembaka

Reog,

Jarene budayane cah enom,

Wayang,

Jarene budaya sing wis ilang?

Unggah ungguh,

Jarene budaya sing wis ra mungguh,

Tata krama,

Jare budaya sing wis ra ana?

Jare sapa?

He? Jare sapa?

Reneo! Meleko!

Kowe kuwi mung krungu jarene!

Coba sawangen! Coba ngerteni!

Kabeh kuwi prelu dilestariake!

Nek ora kowe-kowe meh sapa maneh?

Ora enom, ora tua, kabeh duwe budaya

Ora wong desa, ora wong kota, kabeh duwe budaya.

Kabeh kudu melu nglestarekake

2.       Jan Kebangeten

Budaya jawa jare kalah karo budaya manca

Budaya Jawa jare wis ra ana ajine

Ngrembakaake budaya kui kudu!

Udu. Udu budaya manca sing jarene lagi hits!

Ora mung budaya manca sing kudu disinaoni,

Nanging budayamu dhewe kudu dirembakake,

supaya ora ilang diaku wong manca

apa lila?

Yen budaya Jawa diaku marang Negara manca?

Apa lila?

Yen budaya Jawa wis ora ana maneh?

Apa lila?

Anak putu wis rareti budaya

Amarga wong tuwa sing wegah ngengalna.

Malah kepara wis lali budaya

Jan kebangeten!

3.       Reogan

Ah! Apike!

Padha jejogetan rana rene ing jero pager pring

Jarane di oyag-ayig bebarengan karo kanca-kancane

Pancen sajak nyeni!

Kuwi lak kanggo wong sing reti seni

Eh, lakok ana bocah wingi sore,

Sajak ngece budaya sing diduweni Jawa iki

Jarene Musrik,

Jarene kapir,

jarene iki

Jarene kuwi

Ealah nang! Ngertio!

Reog kuwi ora ngelek-eleki donya

Reog kuwi ora meh nyekuthuke agama

Sing main ya duwe agama

Kui mung budaya

Kui tinggalan leluhurmu

Kuwi kudu dirembakakake

Uga perlu dijaga!

Supaya ora ilang dipangan jaman!

4.       Ngendikane Ibu

Ndhuk,

Tak kandhani,

Jaman ibuk cilik,

Dolanane ibuk kuwi udu hape kaya sing mbok gujeng,

Ibuk biyen dolanane ya mung dakon, engklek, gobag sodor, karo karetan

La kok saiki dolananmu karo kanca-kancamu wis beda

Wis jamane canggih, kabeh serba elektronik

Pancen wis ra budayane bocah jaman saiki

Dolan ning jaba karo kanca-kancane

Gawe rame kahanan ing desa

Jan… ibuk kapang, Ndhuk

Karo budaya dolanan jaman biyen!

5.       Unggah-ungguh

Ndhuk, Le

Jaman pancen wis owah,

Kabeh wis padha canggih,

Nanging aja ngasi sing siji iki owah,

Unggah ungguh kudu mungguh

Wong tuwa kudu diajeni

Marang liyan kudu tetep ngajeni

Iki perkara budaya Jawa sing jare duwe tata krama

Udu perkara wong tuwa sing wis kuna

Ngertio! Budaya Jawa kudu tetep ngrembaka!

Aja ngasi dadi wong Jawa sing ilang Jawa ne!

6.       Langgar

Adan wis keprungu saka langgar

Bocah-bocah padha budhal menyang langgar

Rebutan panggonan salat sing ngarep dhewe

Bengok aamiin paling banter ben supaya padha krungu

Bubar solat padha melu imam wiridan

Rampung donga ora langsung bali

Malah kepara antri ngaji ing meja dawa

Nanging,kuwi biyen,

Nalika langgar isih rame bocah,

Budaya sing uwis punah

Biyen langgar rame bocah

Saiki bocah padha ing njero omah

Biyen maghrib rebutan sholawat

Saiki maghrib padha banterke suara teve

Langgar, muga rame meneh.

Kaya adat saben dina,biyen

7.       Bocah

Bocah saiki ora reti budaya

Emboh merga wong tuwa sing lali budaya

Emboh wong tuwa sing wis wegah ngelingke?

Jaman wis gawe  budaya daerah kegusur

Budaya daerah kaya-kaya wis ra kanggo

Wis ora dibutuhake lan dilaleke

Malah kepara bocah-bocah padha tiru budaya barat

Ealah cah, nguri-uri budayamu dhewe ki ya perlu!

8.       Mitoni

Wis gedhe temen weteng sing ana kandhutan e iki

Ra krasa umur kandhutane wis ngancik umur pitong sasi

Jabang bayi wis nendhang-nendhang sajak geger pengen metu

Calon ibu sajak mesem tan ora leren

Calon simbah ora leren olehe ngandhani calon ibu

Wis wayahe adat mitoni dianakake

Kanggo dongani jabang bayi muga lancar anggone lair mengko

Supaya ibu lan bayi padha sehat e nganti lairan

Gambar Kamaratih lan Kamajaya pralambang bagus anake

9.       Budaya Jawa

Budaya Jawa kuwi apa?

Budaya Jawa nggone sapa?

Budaya Jawa kuwi sapa sing ngajarake?

Budaya Jawa kuwi kudu diapake?

Cah, ngertiya

Budaya Jawa kuwi budayane wong Jawa

Sing jarene manggon ing Jawa Tengah, Ngayogyakarta, utawa Jawa TImur

Budaya Jawa kuwi ora mung diajarake, nanging kudu disinaoni

Budaya Jawa kuwi ya kudu dirembakake!

10.   Nyekar

Takbiran krungu saka masjid

Bubar sola ied

Nuli sing enom njaluk ngapura karo sing tuwa

Manjing srengengene wis radha munggah

Sing padha duwe leluhur budhal sarean

Ora liya kanggo ndongake leluhure

Supaya padha mulya ing alam barzah

Ora lali dhuwur kubur diwenehi sekar

Supaya tansah arum diambu kabeh ciptaNe Gusti